World News

വാഷിംഗ്ടൺ: വെനിസ്വേലൻ പ്രസിഡന്റ് നിക്കോളാസ് മഡുറോയെ യുഎസ് സൈനിക ഓപ്പറേഷനിലൂടെ പിടികൂടിയതിന് പിന്നാലെ ലാറ്റിനമേരിക്കൻ രാജ്യങ്ങളിലെ മയക്കുമരുന്ന് മാഫിയകൾക്കെതിരെ കടുത്ത നടപടികളുമായി മുന്നോട്ട് പോകുമെന്ന് പ്രഖ്യാപിച്ച് യുഎസ് പ്രസിഡന്റ് ഡൊണാൾഡ് ട്രംപ്. മഡുറോയുടെ പതനം വെറും തുടക്കം മാത്രമാണെന്നും വരും ദിവസങ്ങളിൽ മെക്സിക്കോയിലെയും കൊളംബിയയിലെയും മയക്കുമരുന്ന് കാർട്ടലുകൾക്കെതിരെ നേരിട്ടുള്ള സൈനിക നീക്കങ്ങൾ ഉണ്ടായേക്കുമെന്നും ട്രംപ് മുന്നറിയിപ്പ് നൽകി. 'ഓപ്പറേഷൻ അബ്സല്യൂട്ട് റിസോൾവ്' എന്ന് പേരിട്ട അതീവ രഹസ്യ നീക്കത്തിലൂടെയാണ് മഡുറോയെയും സംഘത്തെയും യുഎസ് സേന പിടികൂടിയത്.

മയക്കുമരുന്ന് കടത്ത്, ഭീകരവാദ ബന്ധം തുടങ്ങിയ ഗുരുതരമായ കുറ്റാരോപണങ്ങളാണ് മഡുറോയ്ക്കും അനുയായികൾക്കുമെതിരെ അമേരിക്ക ചുമത്തിയിരിക്കുന്നത്. മഡുറോയുടെ അറസ്റ്റോടെ മേഖലയിലെ മയക്കുമരുന്ന് വിതരണ ശൃംഖല തകർന്നതായും കോടിക്കണക്കിന് ഡോളറിന്റെ ആസ്തികൾ ഇതിനോടകം കണ്ടുകെട്ടിയതായും യുഎസ് അറ്റോർണി ജനറൽ പാം ബോണ്ടി വ്യക്തമാക്കി. മെക്സിക്കൻ മയക്കുമരുന്ന് മാഫിയകൾ രാജ്യത്തെ ഭരിക്കുന്നുവെന്നും അവർക്കെതിരെ യുഎസ് സൈനികരെ അയക്കാൻ തയ്യാറാണെന്നും ട്രംപ് കഴിഞ്ഞ ദിവസം ആവർത്തിച്ചിരുന്നു.

ക്യൂബ, കൊളംബിയ തുടങ്ങിയ രാജ്യങ്ങൾക്കും ട്രംപ് കർശന മുന്നറിയിപ്പ് നൽകിയിട്ടുണ്ട്. വെനിസ്വേലയിൽ നിന്നുള്ള എണ്ണ നിലയ്ക്കുന്നതോടെ ക്യൂബൻ ഭരണകൂടം തകർച്ചയുടെ വക്കിലാണെന്നും അധികം വൈകാതെ അവിടെയും മാറ്റങ്ങൾ സംഭവിക്കുമെന്നും ട്രംപ് മാധ്യമങ്ങളോട് പറഞ്ഞു. മഡുറോയെ പിടികൂടിയ ശേഷം വെനിസ്വേലയുടെ ഭാവി കാര്യങ്ങൾ ചർച്ച ചെയ്യാൻ പ്രതിപക്ഷ നേതാക്കളുമായി വൈറ്റ് ഹൗസ് ആശയവിനിമയം ആരംഭിച്ചു കഴിഞ്ഞു. ഡെൽസി റോഡ്രിഗസിനെ ഇടക്കാല പ്രസിഡന്റായി അമേരിക്ക അംഗീകരിച്ചതായാണ് സൂചന.

അതേസമയം, അമേരിക്കയുടെ ഈ നീക്കങ്ങൾ അന്താരാഷ്ട്ര തലത്തിൽ വലിയ ചർച്ചകൾക്ക് വഴിവെച്ചിട്ടുണ്ട്. മറ്റൊരു രാജ്യത്തിന്റെ ഭരണാധികാരിയെ സൈനിക ബലത്തിൽ പിടികൂടിയത് പരമാധികാരത്തിന്മേലുള്ള കടന്നുകയറ്റമാണെന്ന് റഷ്യയും ഇറാനും കുറ്റപ്പെടുത്തി. എന്നാൽ സ്വന്തം രാജ്യത്തെ ജനങ്ങളുടെ ജീവൻ രക്ഷിക്കാനും ആഗോള മയക്കുമരുന്ന് വ്യാപാരം തടയാനും ഇത്തരം കർശന നടപടികൾ അത്യാവശ്യമാണെന്നാണ് ട്രംപ് ഭരണകൂടത്തിന്റെ നിലപാട്. മെക്സിക്കോ അടക്കമുള്ള അയൽരാജ്യങ്ങൾ ഈ നീക്കത്തിൽ ആശങ്ക രേഖപ്പെടുത്തിയിട്ടുണ്ട്. ലാറ്റിനമേരിക്കൻ രാഷ്ട്രീയത്തിൽ പതിറ്റാണ്ടുകളായി നിലനിന്നിരുന്ന സമവാക്യങ്ങളെ പാടെ മാറ്റിയെഴുതുന്നതാണ് ട്രംപിന്റെ പുതിയ വിദേശനയം.