World News

ടെഹ്‌റാൻ: അമേരിക്കയുടെ സൈനിക ആക്രമണം ഉണ്ടാകുമെന്ന അഭ്യൂഹങ്ങൾ ശക്തമായതോടെ ഇറാൻ തങ്ങളുടെ വ്യോമപാത ഭാഗികമായി അടച്ചു. ഇതോടെ ഇന്ത്യയിൽ നിന്നുള്ളവ ഉൾപ്പെടെ നിരവധി അന്താരാഷ്ട്ര വിമാന സർവീസുകൾ തടസ്സപ്പെട്ടു. വ്യാഴാഴ്ച പുലർച്ചെ 3:45-ഓടെയാണ് വ്യോമപാത അടച്ചതെങ്കിലും രാവിലെ 7:30-ഓടെ നിയന്ത്രണങ്ങളിൽ ഇളവ് വരുത്തി. എന്നാൽ മേഖലയിൽ സംഘർഷ സാധ്യത നിലനിൽക്കുന്നതിനാൽ വിമാനക്കമ്പനികൾ കനത്ത ജാഗ്രതയിലാണ്.

സുരക്ഷാ കാരണങ്ങളാൽ ഇന്ത്യയിൽ നിന്നും അമേരിക്കയിലേക്കുള്ള മൂന്ന് വിമാനങ്ങൾ എയർ ഇന്ത്യ റദ്ദാക്കി. യൂറോപ്പിലേക്കുള്ള വിമാനങ്ങൾ ദൂരമേറിയ ബദൽ പാതകളിലൂടെയാണ് ഇപ്പോൾ സഞ്ചരിക്കുന്നത്. ഇത് യാത്രാസമയം വർദ്ധിക്കാനും വിമാനങ്ങൾ വൈകാനും കാരണമാകുന്നുണ്ട്. യാത്രക്കാരുടെ സുരക്ഷയ്ക്കാണ് മുൻഗണനയെന്നും സ്ഥിതിഗതികൾ നിരീക്ഷിച്ചു വരികയാണെന്നും എയർ ഇന്ത്യ അറിയിച്ചു.

ഇറാനിലുള്ള ഇന്ത്യൻ പൗരന്മാർക്ക് ഇന്ത്യൻ എംബസി ജാഗ്രതാ നിർദ്ദേശം നൽകി. അനാവശ്യ യാത്രകൾ ഒഴിവാക്കണമെന്നും പ്രതിഷേധങ്ങൾ നടക്കുന്ന സ്ഥലങ്ങളിൽ നിന്ന് വിട്ടുനിൽക്കണമെന്നും എംബസി നിർദ്ദേശിച്ചു. സാധ്യമായവർ എത്രയും വേഗം രാജ്യം വിടണമെന്നും നിർദ്ദേശമുണ്ട്. ഇറ്റലി, സ്പെയിൻ, പോളണ്ട് എന്നീ രാജ്യങ്ങളും തങ്ങളുടെ പൗരന്മാരോട് ഇറാൻ വിടാൻ ആവശ്യപ്പെട്ടിട്ടുണ്ട്.

ഇറാനിൽ തുടരുന്ന ആഭ്യന്തര പ്രക്ഷോഭങ്ങൾ അടിച്ചമർത്തുന്നതിനെതിരെ അമേരിക്കൻ പ്രസിഡന്റ് ഡോണൾഡ് ട്രംപ് കനത്ത മുന്നറിയിപ്പ് നൽകിയിരുന്നു. ഇതിന് പിന്നാലെയാണ് മേഖലയിൽ സൈനിക നീക്കമുണ്ടാകുമെന്ന ഭീതി പരന്നത്. തങ്ങളെ ആക്രമിച്ചാൽ അയൽരാജ്യങ്ങളിലെ അമേരിക്കൻ സൈനിക താവളങ്ങൾ ലക്ഷ്യമിട്ട് തിരിച്ചടിക്കുമെന്ന് ഇറാൻ മുന്നറിയിപ്പ് നൽകിയിട്ടുണ്ട്. സംഘർഷം ലഘൂകരിക്കാൻ സൗദി അറേബ്യ ഉൾപ്പെടെയുള്ള രാജ്യങ്ങൾ ഇടപെടണമെന്ന് ഇറാൻ ആവശ്യപ്പെട്ടതായാണ് റിപ്പോർട്ടുകൾ.