UK News

മാഞ്ചസ്റ്റർ: മാഞ്ചസ്റ്റർ എയർപോർട്ടിലെ ഡ്രോപ്പ് ഓഫ് ചാർജുകൾ (Drop-off Charges) അന്യായമാണെന്നും ഇത് സാധാരണക്കാരെ ബുദ്ധിമുട്ടിക്കുന്നുവെന്നും പാർലമെന്റിൽ വിമർശനം. ഓൾഡം വെസ്റ്റ് എംപിയായ ജിം മക്മോഹൻ ആണ് ഈ വിഷയം വെസ്റ്റ്മിൻസ്റ്റർ ഹാളിൽ നടന്ന ചർച്ചയിൽ ഉന്നയിച്ചത്. മാഞ്ചസ്റ്റർ എയർപോർട്ട് ലണ്ടനിലെ ഗാറ്റ്‌വിക് എയർപോർട്ടിനെപ്പോലെ ഉയർന്ന നിരക്കുകൾ ഈടാക്കുന്ന രീതിയിലേക്ക് മാറരുതെന്ന് അദ്ദേഹം മുന്നറിയിപ്പ് നൽകി.

നിലവിൽ അഞ്ച് മിനിറ്റ് നേരത്തെ ഡ്രോപ്പ് ഓഫിന് 5 പൗണ്ടും 10 മിനിറ്റിന് 6.40 പൗണ്ടുമാണ് എയർപോർട്ട് ഈടാക്കുന്നത്. എന്നാൽ നിശ്ചിത സമയം കടന്നാൽ വലിയ പിഴ നൽകേണ്ടി വരും. കുറഞ്ഞ വേതനത്തിൽ ജോലി ചെയ്യുന്നവർക്ക് ഒരു മിനിറ്റ് വൈകിയാൽ ഒരു ദിവസത്തെ ശമ്പളം പിഴയായി നൽകേണ്ടി വരുന്നത് നീതിയല്ലെന്ന് എംപി ചൂണ്ടിക്കാട്ടി. എയർപോർട്ടിലെ സൈൻ ബോർഡുകളിലെ അവ്യക്തതയും പണമടയ്ക്കാനുള്ള രീതിയിലെ സങ്കീർണ്ണതയും യാത്രക്കാരെ കുഴപ്പിക്കുന്നുണ്ടെന്നും അദ്ദേഹം പറഞ്ഞു.

ഇപ്പോൾ നിലവിലുള്ള ഓൺലൈൻ ആപ്പ് വഴിയുള്ള പണമടയ്ക്കൽ രീതിക്ക് പകരം വിദേശ രാജ്യങ്ങളിലേതുപോലെ 'ടാപ്പ്-ഇൻ' (Tap-in) സംവിധാനം ഏർപ്പെടുത്തണമെന്നും അദ്ദേഹം നിർദ്ദേശിച്ചു. ഈ വിഷയത്തിൽ ഇടപെടണമെന്ന് ആവശ്യപ്പെട്ട് മാഞ്ചസ്റ്ററിലെ പത്ത് കൗൺസിലുകൾക്കും അദ്ദേഹം കത്തയച്ചിട്ടുണ്ട്. ബറി നോർത്ത് എംപിയായ ജയിംസ് ഫ്രിത്തും നേരത്തെ ഇതേ വിഷയത്തിൽ എയർപോർട്ട് അധികൃതരെ വിമർശിച്ചിരുന്നു.

അതേസമയം, ഗതാഗതക്കുരുക്ക് ഒഴിവാക്കാനാണ് ഇത്തരം ചാർജുകൾ ഈടാക്കുന്നതെന്നാണ് എയർപോർട്ട് അധികൃതരുടെ വിശദീകരണം. സൗജന്യമായി യാത്രക്കാരെ ഇറക്കാൻ താൽപ്പര്യമുള്ളവർക്ക് 'ജെറ്റ്പാർക്ക് വൺ' (JetParks One) എന്ന ഏരിയ ഉപയോഗിക്കാമെന്നും അവിടെ നിന്നും ടെർമിനലുകളിലേക്ക് സൗജന്യ ഷട്ടിൽ ബസ് സൗകര്യമുണ്ടെന്നും എയർപോർട്ട് വക്താവ് വ്യക്തമാക്കി.