World News

വിൽനിയസ്: റഷ്യയുമായുള്ള സംഘർഷ സാധ്യത വർദ്ധിക്കുന്ന പശ്ചാത്തലത്തിൽ വൻതോതിലുള്ള യുദ്ധസജ്ജീകരണങ്ങളുമായി ബാൾട്ടിക് രാജ്യമായ ലിത്വാനിയ. യൂറോപ്യൻ യൂണിയനിലെ ചെറിയ രാജ്യങ്ങളിലൊന്നായ ലിത്വാനിയ, റഷ്യയിൽ നിന്നും നേരിടാൻ സാധ്യതയുള്ള ആക്രമണത്തെ പ്രതിരോധിക്കാൻ തങ്ങളുടെ സൈനിക ശേഷിയും അതിർത്തി സുരക്ഷയും അസാധാരണമാംവിധം വർദ്ധിപ്പിക്കുകയാണ്. റഷ്യയുടെ സഖ്യകക്ഷിയായ ബെലാറൂസുമായും റഷ്യൻ അധീനതയിലുള്ള കലിനിൻഗ്രാഡുമായും അതിർത്തി പങ്കിടുന്ന ലിത്വാനിയ ഇപ്പോൾ യൂറോപ്പിന്റെ പ്രതിരോധ നിരയിലെ ഏറ്റവും പ്രധാനപ്പെട്ട കണ്ണിയായി മാറിയിരിക്കുന്നു.

പുതിയ റിപ്പോർട്ടുകൾ പ്രകാരം, അതിർത്തികളിൽ ശത്രുപക്ഷത്തെ ടാങ്കുകളെ പ്രതിരോധിക്കാൻ 'ഡ്രാഗൺ ടീത്തുകൾ' (Dragon's Teeth) എന്നറിയപ്പെടുന്ന കോൺക്രീറ്റ് പ്രതിരോധ നിരകൾ ലിത്വാനിയ സ്ഥാപിച്ചുകഴിഞ്ഞു. കൂടാതെ, 2026 മുതൽ രാജ്യത്ത് നിർബന്ധിത സൈനിക സേവനം (Conscription) നടപ്പിലാക്കാനും തീരുമാനമായിട്ടുണ്ട്. വർഷം തോറും അയ്യായിരത്തോളം യുവാക്കളെ സൈന്യത്തിന്റെ ഭാഗമാക്കാനാണ് ഭരണകൂടം ലക്ഷ്യമിടുന്നത്. സാധാരണക്കാരായ ജനങ്ങൾ ഉൾപ്പെടുന്ന 'റൈഫിൾമെൻസ് യൂണിയൻ' (Riflemen's Union) എന്ന അർദ്ധസൈനിക വിഭാഗത്തിന്റെ അംഗസംഖ്യ ഇരട്ടിയായി വർദ്ധിപ്പിക്കുകയും അവർക്ക് ഡ്രോൺ യുദ്ധമുറകളിലും അട്ടിമറി പ്രതിരോധത്തിലും പ്രത്യേക പരിശീലനം നൽകുകയും ചെയ്യുന്നുണ്ട്.

ദേശീയ സുരക്ഷാ നയത്തിൽ വലിയ മാറ്റങ്ങളാണ് ലിത്വാനിയ വരുത്തിയിരിക്കുന്നത്. 2030-ഓടെ പ്രതിരോധ ബജറ്റ് ആഭ്യന്തര ഉൽപ്പാദനത്തിന്റെ (GDP) 5 മുതൽ 6 ശതമാനം വരെയായി ഉയർത്താൻ പദ്ധതിയുണ്ട്. ഇത് നാറ്റോ നിശ്ചയിച്ചിട്ടുള്ള മിനിമം നിരക്കിനേക്കാൾ എത്രയോ കൂടുതലാണ്. ഉക്രൈന്റെ സുരക്ഷയാണ് യൂറോപ്പിന്റെ സുരക്ഷയെന്ന് വിശ്വസിക്കുന്ന ലിത്വാനിയ, ഉക്രൈനുള്ള സൈനിക സഹായവും വർദ്ധിപ്പിച്ചിട്ടുണ്ട്.

റഷ്യയിൽ നിന്നുള്ള സൈനിക നീക്കം എപ്പോഴുമുണ്ടാകാമെന്ന ഭീതി നിലനിൽക്കുന്നതിനാൽ, വൻനഗരങ്ങളിൽ ജനങ്ങളെ ഒഴിപ്പിക്കാനുള്ള മോക്ക് ഡ്രില്ലുകളും സുരക്ഷിത താവളങ്ങൾ ഒരുക്കലും യുദ്ധകാലാടിസ്ഥാനത്തിൽ നടക്കുന്നു. ഒരു ചെറിയ രാജ്യം എന്ന നിലയിൽ തങ്ങളെ കീഴടക്കുക എന്നത് ശത്രുവിന് അസാധ്യമാക്കുന്ന 'ഹെഡ്‌ജ്‌ഹോഗ്' (Hedgehog) പ്രതിരോധ തന്ത്രമാണ് ലിത്വാനിയ സ്വീകരിച്ചിരിക്കുന്നത്.