Kerala News

റിയാദ്: വഴിയരികിൽ സഹായം അഭ്യർത്ഥിച്ചു നിന്ന അപരിചിതന് ലിഫ്റ്റ് നൽകിയ മലയാളിക്ക് നഷ്ടമായത് സ്വന്തം ജോലിയും 11 വർഷത്തെ സമ്പാദ്യവും. പത്തനംതിട്ട ആറന്മുള സ്വദേശിയായ പ്രസാദ് കുമാറിനാണ് സൗദി അറേബ്യയിൽ വെച്ച് ഈ ദുരനുഭവം ഉണ്ടായത്. 11 വർഷമായി ജിസാനിലെ ഒരു കമ്പനിയിൽ ഡ്രൈവറായി ജോലി ചെയ്തുവരികയായിരുന്നു ഇദ്ദേഹം.

സംഭവം ഇങ്ങനെ: ജിസാനിൽ നിന്നും വരികയായിരുന്ന പ്രസാദ് കുമാർ, വഴിയിൽ ലിഫ്റ്റ് ചോദിച്ച ഒരു യെമൻ സ്വദേശിയെ വാഹനത്തിൽ കയറ്റുകയായിരുന്നു. എന്നാൽ യാത്രയ്ക്കിടെ പോലീസ് നടത്തിയ പരിശോധനയിൽ, യെമൻ സ്വദേശിക്ക് നിയമപരമായ രേഖകളില്ലെന്നും (ഇക്കാമ) അതിർത്തി കടന്ന് നിയമവിരുദ്ധമായി രാജ്യത്ത് എത്തിയതാണെന്നും കണ്ടെത്തി. ഇതോടെ യെമൻ സ്വദേശിക്കൊപ്പം പ്രസാദിനെയും പോലീസ് കസ്റ്റഡിയിലെടുത്തു. ഒരു മാസത്തോളം ജയിൽ വാസം അനുഭവിച്ച ശേഷമാണ് പ്രസാദ് പുറത്തിറങ്ങിയത്.

ജയിൽ മോചനത്തിന് പിന്നാലെ തൊഴിൽ നഷ്ടം: ജയിലിൽ നിന്നും മോചിതനായി കമ്പനിയിൽ തിരിച്ചെത്തിയ പ്രസാദിന് മറ്റൊരു തിരിച്ചടി കൂടി നേരിടേണ്ടി വന്നു. കമ്പനി വാഹനം ഉപയോഗിച്ച് നിയമവിരുദ്ധമായി ടാക്സി സർവീസ് നടത്തിയെന്ന ആരോപണം ഉന്നയിച്ച് അധികൃതർ പ്രസാദിനെ ജോലിയിൽ നിന്നും പിരിച്ചുവിട്ടു. സൗദി തൊഴിൽ നിയമത്തിലെ ആർട്ടിക്കിൾ 80 പ്രകാരം, 11 വർഷത്തെ സർവീസ് ആനുകൂല്യങ്ങളോ ബാക്കി ശമ്പളമോ നൽകാതെയാണ് ഇദ്ദേഹത്തെ പുറത്താക്കിയത്.

ഒടുവിൽ നിയമ നടപടികൾ പൂർത്തിയാക്കാൻ കഴിയാതെയും നാട്ടിലേക്ക് മടങ്ങാൻ പണമില്ലാതെയും വലഞ്ഞ പ്രസാദ് റിയാദിലെ കേളി കലാസാംസ്കാരിക വേദിയുടെ സഹായം തേടുകയായിരുന്നു. കേളിയുടെ ഇടപെടലിലൂടെ എക്സിറ്റ് നടപടികൾ പൂർത്തിയാക്കി അദ്ദേഹം നാട്ടിലേക്ക് മടങ്ങി. പ്രവാസികൾ നിയമങ്ങൾ പാലിക്കുന്നതിൽ അതീവ ജാഗ്രത പുലർത്തണമെന്നും, അപരിചിതർക്ക് ലിഫ്റ്റ് നൽകുന്നത് പോലുള്ള കാര്യങ്ങൾ വലിയ നിയമക്കുരുക്കുകളിൽ എത്തിക്കുമെന്നും ഈ സംഭവം വീണ്ടും ഓർമ്മിപ്പിക്കുന്നു.